தாக்குதல் நடத்தியவர்கள் மேல் நடவடிக்கை - முதல்வர்

தினகரன் அலுவலகத்தில் நடத்தப்பட்ட தாக்குதலுக்கு காரணமானவர்கள் மீது நடவடிக்கை எடுப்பேன் என்று முதல்வர் கருணாநிதி தெரிவித்துள்ளார்.
முதல்வர் கருணாநிதி நேற்று வெளியிட்ட அறிக்கையில் கூறியிருப்பதாவது:
கலைஞரின் அரசியல் வாரிசாக யார் வரவேண்டும் என்ற கேள்விக்குத் தரப்பட்ட பதில்களின் விளைவாக இன்றைய தினம் விலைமதிக்க முடியாத 3 வாலிபர்களின் உயிர்கள் நம்மை விட்டும் பிரிந்து சென்று விட்டன. நாம் என்னதான் பேசினாலும், எழுதினாலும் போய் விட்ட அந்த உயிர்களை மீட்டுக் கொண்டு வர முடியாது. அவர்களை இழந்து தவிக்கும் குடும்பத்தினருக்கு ஆறுதலை எவ்வளவுதான் தெரிவித்தாலும், சமாதானம் செய்ய முடியாது. பணிக்குச் சென்று மாலையில் பத்திரமாகத் திரும்புவார்கள் என்ற எண்ணத்தோடு சென்ற செல்வங்கள் மறைந்து விட்டச் செய்தியினை யாரால்தான் தாங்கிக் கொள்ள முடியும். எனவே, நடைபெற்ற அந்த வன்முறைச் சம்பவத்தை வன்மையாகக் கண்டிப்பதுடன், இவற்றுக்குக் காரணமாக யார் இருந்தாலும் அவர்கள் மீது கண்டிப்பாக சட்டப்படியான நடவடிக்கை இந்த அரசினால் எடுக்கப்படும் என்ற உறுதியை நான் தெரிவித்துக் கொள்கிறேன்.
பத்திரிகை அலுவலகத்தின் மீது நடத்தப்பட்ட தாக்குதலுக்காக அந்தத் துறையைச் சார்ந்த நண்பர்கள் எல்லாம் அதனைக் கண்டித்து அறிக்கை கொடுத்துள்ளார்கள். அவர்களின் உணர்வோடு நானும் ஒன்றுபடுகிறேன். எந¢தப் பத்திரிகையாக இருந்தாலும் அதன் மீது தாக்குதல் நடத்துவதை ஜனநாயகத்தின் மீதும், பத்திரிகைச் சுதந்திரத்தின் மீதும் மிகுந்த நம்பிக்கை கொண்டுள்ள நான் எந்தக் காலத்திலும் ஏற்றுக் கொண்டவன் இல்லை. எனவே, நடைபெற்ற செயலுக்காக எனது வருத்தத்தைக் தெரிவித்துக் கொள்கிறேன். தாக்குதல் சம்பவத்தை வன்மையாகக் கண்டிக்கிறேன். இந்தச் சம்பவத்திலே உயிர் இழந்த மூவரின் குடும்பங்களுக்கும் ரூ.2 லட்சம் நிதி அளிக்க வேண்டும் என்று பத்திரிகையாளர்களின் சார்பில் தெரிவித்துள்ள கோரிக்கையினை ஏற்று, முதல் அமைச்சர் நிவாரண நிதியில் இருந்து, 3 குடும்பங்களுக்கும் தலா ரூ.2 லட்சம் வீதம் அளிக்கப்படும் என்று தெரிவித்து கொள்கிறேன். இவ்வாறு முதல்வர் கூறியுள்ளார்